Семей қаласында спорттық және жауынгерлік самбодан Қазақстан чемпионаты аяқталды. «Арена» мәдени-спорт кешенінде өткен ел чемпионатына 470 самбошы бақ сынады. Ел чемпионаты самбо күресінен КСРО-ның спорт шебері, самбо күресінен Қазақ КСР-іне еңбегі сіңген бапкер, Қазақстан Республикасына еңбегі сіңген қайраткер, Тәуелсіз мемлекеттер достастығы бойынша еңбегі сіңген өнер және спорт қайраткері, Қазақ КСР-інің ағарту озаты, самбо күресінен Қазақстан ұлттық құрама командасының 18 жыл бас бапкері болған, ардагерлер арасында самбо күресінен үш дүркін және дзюдо күресінен Әлем чемпионы Керей Қойшыбектің құрметіне өтті. Чемпионатқа еліміздің 14 облысы және Нұр-Сұлтан, Алматы, Шымкент қалаларынан 470 спортшы (ерлер және жауынгерлік самбо 8 салмақ, әйелдер 7 салмақта) қатысты. Айта кетейік, жарыс FIAS Халықаралық самбо федерациясының бекіткен ережесіне сай өтті. Ел чемпионатында Шығыс Қазақстан намысын Жақсылық Үшкемпіров атындағы спорт мектебінің спортшылары да қорғады. Ерлер арасында 64 келіде Есентай Имаханов Қарағанды облысының спортшысы, өткен жылы Тәшкентте Әлем чемпионы атанған Рахат Жананиетті ұтып, ел чемпионы атанды. 88 келіде Руслан Жарқынбаев қола жүлдеге қол созса, жауынгерлік самбодан 64 келіде Маратбек Рахметоллин де үздік үштікті түйіндеді.
Жақсылық Үшкемпіров атындағы спорт мектебінің баспасөз қызметі.
